Պարզապես հոգնածությո՞ւն, թե՞

Գերհոգնածությունը միշտ չէ, որ կապված է քնի պակասի հետ. գուցե թուլության համար կան այլ պատճառներ ևս: Պարզենք միասին: Դու հոգնածության զգացում ես ունենում...

… Միայն «այն» օրերից անմիջապես առաջ և հաջորդ երկու օրը

Այդ թուլությունը կարող է բացատրվել ուղեղի աշխատանքի համար կարևոր սերոտոնին հորմոնի քանակի նվազմամբ: Արդյունքում՝ պասիվություն ու հոգնածություն ես զգում: Վիճակդ կարող է կապված լինել նաև քունը խանգարող ցավերի հետ: Այդ դեպքում օգնության են գալիս ցավազրկողները: Եթե մարզասրահ ես հաճախում, «այդ» օրերին բաց չթողնես պարապմունքներդ. մարզումները քեզ էներգիա կհաղորդեն ու կվերականգնեն սերոտոնինի մակարդակն օրգանիզմում:

… Ճաշելուց մոտ մեկ ժամ հետո

Քեզ մոտ սկսվում է կարբոնատային կոմա: Սպիտակ ալյուրից հացը և օսլա պարունակող այլ ուտեստները մարսողության ընթացքում շատ արագ փոխակերպվում են շաքարի, ինչը կտրուկ ավելացնում է արյան մեջ շաքարի պարունակությունը: Սնվելուց հետո` առաջին րոպեների ընթացքում, դու զգում ես մեծ աշխուժություն, իսկ մոտ մեկ ժամ անց, շաքարի տոկոսի նվազման հետ մեկտեղ, վրա է հասնում թուլությունը: Դու քո սննդակարգում պետք է ներառես էներգիա հաղորդող ուտեստներ, օրինակ՝ հավ կամ ձուկ` բանջարեղենով և միայն ամբողջական հացահատկից հաց, որն ավելի երկար է մարսվում: Բացի այդ, նախաճաշ-ճաշ-ընթրիքի փոխարեն սնվիր փոքր չափաբաժիններով` օրվա ընթացքում 4-6 անգամ: Որքան ավելի մեծ է մեկ անգամվա ընթացքում ընդունած սննդի չափաբաժինը, այնքան ավելի շատ էներգիա է անհրաժեշտ այն մարսելու համար. հենց դա էլ քեզ թուլացնում է:

… Որը հաճախ զուգորդվում է կոպի ջղաձգումներով

Ջղաձգումը սթրեսի ակնհայտ նշան է: Կարող ես փորձել ավելի վաղ պառկել քնելու, սակայն արդյունավետ կլինի վերանայել օրվա ընթացքում կատարած գործերը և հնարավորինս կրճատել սթրեսային վիճակները: Կարող ես, օրինակ, պարբերաբար դադարեցնել աշխատանքը և մի քանի րոպե ունկնդրել հաճելի երաժշտություն, զբաղվել յոգայով կամ քնից առաջ տաք լոգանք ընդունել:

…Եվ այդպես շարունակվում է արդեն մի քանի շաբաթ

Պատասխանը մեկն է` դեպրեսիա: Ընկճվածության պատճառով օրգանիզմդ թուլանում է, և թվում է, թե չես կարող կենտրոնանալ ոչ մի գործի վրա: «Այնքան հոգնած եմ, որ ոչ մի բանի ուժ չունեմ» վիճակը չի անցնում անգամ 7-8 ժամ լիարժեք քնելուց հետո: Թերևս, հոգեբանին այցելելու ժամանակն է: Եթե քեզ մոտ իրոք դեպրեսիա է, նա կօգնի բացահայտել քո ինքնազգացողության դրդապատճառները և, անհրաժեշտության դեպքում,  բուժում կնշանակի:

… Ու ասես մշուշում լինես: Աշխատավայրում հաճախակի ես սխալներ թույլ տալիս ու դարձել ես մոռացկոտ:

Թերևս պատճառը քնի պակասն է. ուղեղդ չի հասցնում լիցքավորվել, իսկ դու չես կարողանում սթափ դատել: Փորձիր անցնել առնվազն 7-8 ժամ շարունակական քուն ստանալու ռեժիմին, 16:00-ից հետո բացառիր սուրճը, անկողին մտնելուց առաջ անջատիր համակարգիչդ, հեռախոսդ և այն ամենը, ինչը կարող է քեզ շեղել, ինչպես նաև նվազեցրու ննջասենյակի ջերմաստիճանը:

…Ամեն օր` 16:00-18:00-ը ընկած հատվածում: Հետո անցնում է:

Սովորաբար մեր օրգանիզմը երեկոյան կողմ մոտ երկու ժամ թուլանում է: Շատերը միայն վատթարացնում են վիճակը` այդ ժամանակ յուղոտ սնունդ ընդունելով կամ աշխուժանալու համար սուրճ խմելով: Ահա հոգնածության դեմ պայքարելու արդյունավետ տարբերակ. տեղից վեր կաց ու մի լավ ձգվիր կամ կարճ զբոսանք կատարիր դրսում` մաքուր օդին: Կարող ես նաև մեկ բաժակ սառը ջուր խմել կամ պրոտեինով հարուստ սենդվիչ ուտել, օրինակ` հնդկահավով և պանրով:

Հարցեր, պատասխաններ, մեկնաբանություններ